PIRING MELAWEN RATAK SARIBU

PIRING MELAWEN RATAK SARIBU

Banda Banda Ba'apuah Urang Borneo "Piring Melawen Retak Seribu"

Sabarataan urang pasti tahu wan ngarannya PIRING MELAWEN RATAK SARIBU ni tie. Ngarannya gen ratak saribu, barti banyak bangat rangatnya. Sabujurnya piring naya kadanya ratak pang, lamun lantaran gambar atawa motifnya nang bagaris-garis kaya ratak wan banyak bangat, lantaran nangitu lalu dingarani ratak saribu.

Piring na ya tie macam-macam ukurannya, ada nang diamitirnya baukuran 40 cm sampai 60 cm. Piring naya gen banyak jua mutif-mutif tambahannya, ada nang bagambar burung, gambar naga wan gambar kambang. Piring melawen ni tie tamasuk banda langka, kanapa jadinya langka? Itu lantaran umur piringnya nitu ratusan wan ribuan tahun, ada nang diulah urang tumatan abad 17, abad 18, tumatan dinasti Ming, Dinasti Ching, ada jua tumatan jaman majapahit.

Salain piring na ya tamasuk banda langka, piring ni tie ada apuahnya jua. Bubuhan padatuan kita bahari sampai damini banyak nang parcaya kalunya piring na ya tie bilanya lumbuk parawit digintas ka piring nitu lalu kita rasani kada tarasa padasnya, munnya santan dirandam ka piring ni tu lalu diganakan samalaman kada babasian, makanan gen diandak ka piring nitu kada mau basi jua, munnya kapala pina ngalu atawa paning, buat haja banyu ka piring nitu lalu ditampungashakan, ampih ngalu atawa paningnya, masih banyak lagi apuah-apuah piring nitu.

Lantaran langka wan ada apuahnya ni tu Piring Melawen Ratak Saribu ni tie banyak dicari-cari urang. Maka tie urang nang mancari ni tu wani “mahadiahi” piring ni tu haraga larang ada nang sampai wani manukari piring ni tu puluhan juta sampai ratusan juta asal nang asli aja pang piringnya, limbah ni tu dijual urang pulang ka kulektur barang antik wan haraga nang labih larang lagi.

Lamun, napa haja nang ngarannya banda ba’apuah ni tu, sabarataannya lantaran kekuasaan Allah Ta’ala aja, jadi kita kada bulih parcaya bangat kaina kalu pina syirik, artinya sabagai ihtiar ja.